បារាំង៖ ការផ្តល់វ៉ាក់សាំងដូសទី១ បានកើនឡើងដល់ជាង ២០លាននាក់ ដែលស្មើនឹង ១/៣ នៃចំនួនប្រជាជនសរុបរបស់ប្រទេសបារាំង ក្នុងនោះប្រមាណ ៩លាននាក់ទទួលវ៉ាក់សាំងដូសទី២រួចរាល់ ខណៈដែលប្រទេសនៃទ្វីបអឺរ៉ុបមួយនេះ គ្រោងបញ្ចប់ការបិទខ្ទប់ប្រទេសនៃថ្ងៃចន្ទដើមសប្តាហ៍នេះ។

នាយករដ្ឋមន្ត្រីបារាំង លោក ហ្សង់ កាស្តិច (Jean Castex) បានលើកឡើងថា៖ “នេះជារឿងសំខាន់បំផុតមួយ ដែលជាចក្ខុវិស័យរបស់ប្រទេសបារាំងក្នុងការបិទបញ្ចប់ និងយកឈ្នះទៅលើវិបត្តិកូវីដ-១៩”។ 


ដោយឡែក រដ្ឋមន្រ្តីសុខាភិបាលបារាំងវិញ បានដាក់ចេញនូវវិធានការសុខភាពមួយចំនួន មុននឹងប្រទេសបារាំងបើកដំណើរការឡើងវិញនៅថ្ងៃចន្ទដើមសប្តាហ៍ក្រោយតទៅ បន្ទាប់មានការធ្លាក់ចុះយ៉ាងគំហុកនូវការរកឃើញករណីអ្នកឆ្លង និងអ្នកស្លាប់ដោយសារជំងឺកូវីដ។ អាជីវកម្មសំខាន់ៗដែលមិនប្រឈមនិងការរីករាលដាលរួមមាន ភោជនីយដ្ឋាន និងហាងកាហ្វេ អាចបើកដំណើរការឡើងវិញបាន ដោយប្រកាន់យកនូវវិធានការមួយចំនួនដូចជា ទទួលភ្ញៀវមកទទួលទានអាហារបានដោយមិនលើសពី ៦នាក់ក្នុងមួយតុជាដើម។

ដោយឡែកសម្រាប់ភ្ញៀវទេសចរបរទេសវិញ រដ្ឋាភិបាលគ្រោងនឹងទទួលស្វាគមន៍មកវិញ ចាប់ពីថ្ងៃទី ៩ ខែមិថុនា ដោយភ្ជាប់លក្ខខណ្ឌតម្រូវឱ្យចាក់វ៉ាក់សាំងរួចរាល់ ឬត្រូវធ្វើតេស្តអវិជ្ជមានមុននឹងចូលមកប្រទេសបារាំង។ ចំពោះអាជីវកម្មកម្សាន្តសប្បាយពេលរាត្រីវិញ មានសញ្ញាណអាចបើកដំណើរការឡើងវិញបាននៅថ្ងៃទី ៣០ ខែមិថុនា ប្រសិនបើករណីឆ្លងថ្មីស្ថិតក្នុងកម្រិតទាបដូចបច្ចុប្បន្ននេះ៕